Logo
Blaðið /
Sæsnigill sem færir lukku
Sæeyru, eða abalónur, eru ein verðmætasta eldistegund heims. Eftirspurn eftir þessu eftirsótta hlýsjávardýri er miklu meiri en framboðið enda þykir bragðið einstakt. Auk þess er það talið boða mikla lukku að borða abalónur við hátíðleg tækifæri, til dæmis til að fagna nýju ári. Fyrirtækið Sæbýli ræktar abalónur í eldisstöð sinni í Grindavík, enda er þar að finna kjöraðstæður fyrir slíka ræktun á Íslandi.
Sæsnigill sem færir lukku image

Sæeyru eru stórir sjávarsniglar, en lögun kuðunga þeirra er talin líkjast mannseyrum. „Við notum annað orð, köllum þá abalónur, enda heita sæsniglarnir abalones á ensku,“ segir Vala Valþórsdóttir, forstjóri Sæbýlis og segir þær þykja mikið lostæti og einstakar á bragðið.

Til eru um 100 tegundir abalóna í heiminum og þær stærstu verða um 30 cm í þvermál. Kuðungar abalóna eru flatari og breiðari en flestir aðrir kuðungar. Á einni hliðinni eru lítil göt sem snigillinn myndar sjálfur þegar hann vex, þar streymir sjór inn sem hjálpar honum að fá súrefni. Að innan er kuðungurinn klæddur glansandi perlumóður sem gerir skelina bæði sterka og fallega. Súrnun sjávar og tíðar breytingar á hitastigi andrúmslofts er m.a. þess sem hefur haft þau áhrif að nánast allar tegundir abalóna eru í útrýmingarhættu. Af þessum sökum hefur eldi abalóna aukist víðsvegar í heiminum og gegnir mikilvægu hlutverki í verndun tegundarinnar og tryggir framboð.

„Við erum að rækta tvær tegundir, Californian Red frá Ameríku og Ezo frá Japan. Ein helsta ástæðan fyrir því að við getum ræktað abalónur á Íslandi er sú að við fáum aðgang að jarðvarma. Í dag erum við með 3200 fermetra húsnæði í Grindavík sem við nýtum undir eldið okkar og öll framleiðsluslustigin eru hér í Grindavík,“ segir Vala.

Vala Valþórsdóttir, forstjóri Sæbýlis.


Sæbýli hefur síðan 2007 unnið markvisst að rannsóknum, undirbúningi og eldi abalóna og byggt upp sinn eigin klakstofn. Verkefnið er upphaflega hugarfóstur Ásgeirs Eiríks Guðnasonar sem lengi vann hjá Hafrannsóknastofnun og er hann ásamt Eyrir Invest og Sigurði Péturssyni, stærstu hluthafar Sæbýlis.

Framundan eru spennandi tímar með umfangsmikilli uppbyggingu í Auðlindagarðinum á Reykjanesi, þar sem hátæknivædd áframeldisstöð fyrirtækisins mun skapa grunn fyrir aukna framleiðslu. Þar verða íslenskar náttúruauðlindir nýttar. „Við munum nýta affals sjó úr Reykjanesvirkjun inn í okkar eldi. Reykjanesvirkjun er eina jarðvarmavirkjunin í heiminum sem nýtir kaldan sjó til að kæla túrbínuna og skilar honum heitum til baka. Við munum nota hluta af þessum sjó í okkar eldi enda erum við með hlýsjávartegund,“ útskýrir Vala að lokum.